“Yay şumunun əhəmiyyəti” mövzusunda maarifləndirici təlim keçirilib

Kürdəmir Təcrübə Sınaq Stansiyasının əkin sahəsində fermerlər üçün “Yay şumunun əhəmiyyəti” mövzusunda maarifləndirici təlim keçirilib.
Aqrar Xidmətlər Agentliyi Aqrar Təlim Mərkəzinin Kürdəmir Regional Təlim Mərkəzi və Əkinçilik Elmi Tədqiqat İnstitutunun birgə təşkilatçılığı ilə baş tutan təlimdə yay şumunun əhəmiyyəti və üstünlükləri barədə kənd təsərrüfatı məhsul istehsalçılarına ətraflı məlumat verilib. Qeyd olunub ki, ən vacib aqrotexniki tədbirlər, xüsusilə də yay şumunun keyfiyyətli aparılması növbəti təsərrüfat ilində məhsuldarlığın artırılması üçün əsas amillərdən sayılır. Mütəxəssislər tərəfindən torpaqda nəmliyin qorunub saxlanması, sahədə mövcud olan xəstəlik və zərərvericilərlə mübarizə aparılması, sahədə gəmiricilərin və alaq otlarının geniş yayılmasının qarşısının alınması üçün yay şumunun aparılmasının vacib olduğu təlim iştirakçılarının diqqətinə çatdırılıb.
Yay şumunun gec aparılması torpağın strukturunun pozulmasına, sahənin kəltənli olmasına səbəb olmaqla növbəti səpin mövsümündə ağır malalardan, digər aqreqatlardan istifadəni zəruri edir, nəticədə torpağın əkin üçün hazırlanması əlavə xərclərin yaranmasına gətirib çıxarır. Bu baxımdan məhsul yığımından sonra növbəti əkinə hazırlığa dərhal başlanılmasında yay şumunun əhəmiyəti böyükdür. Yay şumunun vaxtında aparılması becərmə dövründə fermerlərin əkin məsrəfinin azalmasına, növbəti mövsümdə daha çox məhsul götürməsinə imkan verir. Yay şumu torpağın strukturunu yaxşılaşdırır, alaq otlarına və gəmiricilərə qarşı mübarizə üçün sərf olunan xərcləri azaldır, torpağın üzvi gübrə ilə zənginləşməsini təmin edir. Respublikanın torpaq-iqlim şəraiti payızlıq dənli-taxıl bitkiləri yığıldıqdan sonra təkrar əkin aparılmasına və ikinci məhsul alınmasına imkan verir. Mütəxəssislər şumdan sonra təkrar əkinlərin aparılmasının eyni dərəcədə səmərəli olduğunu deyir. Təkrar əkinlərin həm məhsul artımı, həm də fermerlərin gəlirlərinin artması baxımından böyük əhəmiyyəti var. Çünki, taxıl biçinindən sonra boş qalan sahələrdə təkrar əkinin aparılması torpağın strukturunu yaxşılaşdırır, fermerlər daha çox gəlir əldə edir, əvəzində ölkədə heyvandarlığın yem ehtiyatı daha da zənginləşir.
Tədbirin sonunda fermerləri maraqlandiran suallar təlimçilər tərəfindən cavablandırılıb, yay şumunun əhəmiyyəti barədə ətraflı müzakirələr aparılıb. Təlimdə iştirak edən fermerlərə yay şumunun əhəmiyyəti ilə bağlı maarifləndirici buklet paylanıb.



Xəbərlər  Tarix:   28 İyul 2022 / 15:01


« Əvvəlki xəbər (938 / 7293) Növbəti xəbər »
 






DİGƏR MARAQLI XƏBƏRLƏR