Elm və təhsil naziri Dövlət Proqramı çərçivəsində xaricdə təhsil hüququ qazanan tələbələrlə görüşüb

Avqustun 25-də elm və təhsil naziri Emin Əmrullayev “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı” çərçivəsində 2022-2023-cü tədris ilində xaricdə təhsil almaq hüququ qazanmış tələbələrlə görüşüb.
Görüş zamanı Emin Əmrullayev Azərbaycan Respublikası Prezidentinin müvafiq Sərəncamı ilə təsdiq edilmiş Dövlət Proqramının ölkə rəhbərliyinin gənclərə xüsusi diqqətinin təzahürü olduğunu qeyd edib. Nazir sözügedən proqramın müasir və gələcək əmək bazarının tələblərinə cavab verən rəqabətqabiliyyətli və yüksəkixtisaslı peşəkar kadrların hazırlanmasına, o cümlədən ölkəmizin dinamik inkişaf prosesinə töhfə verəcəyini bildirib.
Elm və təhsil naziri çıxışının sonunda tələbələrə akademik müvəffəqiyyətlər arzulayıb.
Görüşün sonunda tələbələr öz fikirlərini bölüşüb, onları maraqlandıran suallarla bağlı fikir mübadiləsi aparılıb.
Qeyd edək ki, Dövlət Proqramının hədəf göstəricisi 2022–2026-cı illərdə hər il 400 nəfərədək olmaqla, ümumilikdə isə 2000 nəfərədək Azərbaycan Respublikası vətəndaşının xarici ölkələrin nüfuzlu ali təhsil müəssisələrində təhsilinin təmin edilməsidir. Dövlət Proqramı çərçivəsində xarici ali təhsil müəssisələrində təhsil yerlərinin ən azı 80 faizi ali təhsilin magistratura səviyyəsini əhatə edəcək.



Xəbərlər  Tarix:   26 Avq 2022 / 16:51


« Əvvəlki xəbər (502 / 7273) Növbəti xəbər »
 






DİGƏR MARAQLI XƏBƏRLƏR

20 yanvar tədbir
22 Yan 2023 / 21:48